బీజేపీని కాపాడేందుకే రేవంత్‌ డైవర్షన్‌ డ్రామా..!

అసెంబ్లీ ఆమోదించిన బీసీ బిల్లులను కోల్డ్ స్టోరేజీకి పంపేందుకు రేవంత్ రెడ్డి సర్కారు పకడ్బందీ స్క్రీన్ ప్లే రచించిందని ఎమ్మెల్సీ కల్వకుంట్ల మండిపడ్డారు. బీసీలకు విద్య, ఉద్యోగ, రాజకీయాల్లో 42 శాతం రిజర్వేషన్లు కల్పిస్తూ తెలంగాణ అసెంబ్లీ, కౌన్సిల్‌ చేసిన తీర్మానాలను తెరమరుగు చేయడమే ప్రభుత్వ ప్రయత్నమ న్నారు. కేంద్రంలోని నరేంద్రమోదీ ప్రభుత్వాన్ని కాపాడేందుకే సీఎం రేవంత్‌ రెడ్డి డైవర్షన్‌ డ్రామాకు తెర తీశారని ఆగ్రహం వ్యక్తం చేశారు. బుధవారం హైదరాబాద్‌ లో ఆమె మీడియాతో మాట్లాడారు.

బీసీ రిజర్వేషన్ల పెంపు కోసం ఢిల్లీకి అఖిలపక్షాన్ని తీసుకెళ్తానని అసెంబ్లీ, కౌన్సిల్‌ సాక్షిగా హామీ ఇచ్చిన సీఎం రేవంత్‌ రెడ్డి ఢిల్లీలో బుధవారం బీసీ సంఘాలు నిర్వహించిన సమావేశానికి హాజరై అఖిలపక్షం అంశాన్ని డైవ ర్ట్‌ చేశారని తెలిపారు. అఖిలపక్షాన్ని ఢిల్లీకి తీసుకెళ్తే తనకు అన్నివిధాల అండగా నిలుస్తున్న కేంద్రంలోని బీజేపీ సర్కారు ఇరుకున పడుతుందన్నదే రేవంత్‌ రెడ్డి భయమన్నారు. అఖిలపక్ష పార్టీల నాయకులు రిజర్వేషన్ల పెంపుపై కేంద్రాన్ని నిలదీస్తే కేంద్రం ఏదో ఒక నిర్ణయం తీసుకోవాల్సి ఉంటుందని.. మోదీ సర్కా రు బీసీ రిజర్వేషన్ల పెంపునకు సానుకూల నిర్ణయం తీసుకోదు కాబట్టే ఆ పార్టీకి రాజకీయంగా ఇబ్బంది కలుగకూడదనే రేవంత్‌ రెడ్డి అఖిలపక్షాన్ని ఢిల్లీకి తీసుకెళ్లే అంశాన్ని పక్కకు పెట్టాని తెలిపారు.

బీసీ సంఘాలతో సమావేశం తర్వాత కేంద్ర ప్రభుత్వంలోని మంత్రులను కలిసి వినతిపత్రాలు ఇచ్చామని బయటకు వచ్చి చెప్పుకోవాలన్నదే రేవంత్‌ ప్రయత్నమన్నారు. ఇది బీసీలను నమ్మించి నట్టేట ముంచడమేనని మండిపడ్డారు. రేవంత్‌ రెడ్డి చేస్తున్న డైవర్షన్‌ పాలిటిక్స్‌ ను తెలంగాణ సమాజం, బీసీలు గమనిస్తూనే ఉన్నారని హెచ్చరించారు.తెలంగాణ ప్రజల ఓట్లే తప్ప ఇక్కడి వాళ్ల పాట్లు తమకు పట్టవని కాంగ్రెస్‌ అగ్రనాయకత్వం పదే పదే నిరూపించుకుంటుందన్నారు. ఢిల్లీలో బీసీ సంఘాల మీటింగ్‌ కు కాంగ్రెస్‌ అధినేత మల్లికార్జున ఖర్గే, లోక్‌ సభలో ప్రధాన ప్రతిపక్ష నేత రాహుల్‌ గాంధీ హాజరవుతారని ప్రచారం చేసుకున్నారని గుర్తు చేశారు. బీసీ సంఘాలు సమావేశమైన జంతర్‌ మంతర్‌ కు కూతవేటు దూరంలోనే మల్లికార్జున ఖర్గే, రాహుల్‌ గాంధీ ఉన్న సమావేశానికి రాలేదని.. ఇది బీసీలను అవమానించడమేనన్నారు. తెలంగాణ ప్రజల ఓట్లతో గద్దెనెక్కిన పార్టీకి ఇక్కడి ప్రజల ఆకాంక్షలు, మనోభావాలతో పని లేదా అని ప్రశ్నించారు.

రేవంత్‌ సర్కార్‌ సాగిస్తున్న ఏ ఒక్క దమనకాండపై రాహుల్‌ గాంధీ ఇప్పటి వరకు నోరు విప్పలేదన్నారు. లగచర్ల రైతుల మీద, బంజారా మహిళలపై సర్కారు అర్ధరాత్రి కరెంట్‌ తీసి అఘాయిత్యాలకు పాల్పడినా మాట్లాడలేదన్నారు. మూసి ప్రాజెక్టు పేరిట పేద ప్రజల ఇళ్లను కూలగొట్టినా స్పందించలేదని గుర్తు చేశారు. హైదరాబాద్ సెంట్రల్ యూనివర్సిటీలో విద్యార్థులపై పోలీసులు లాఠీలు ఝులిపించినా రాజ్యాంగాన్ని చేతిలో పెట్టుకునే ప్రధాన ప్రతిపక్ష నేత ఎందుకు ఖండించలేదో చెప్పాలన్నారు. ఇప్పుడు ఢిల్లీ వేదికగా మా బీసీ బిడ్డల మీటింగ్‌ కు రాకుండా అవమానించారని.. రాహుల్ గాంధీకి తెలంగాణతో పేగుబంధం లేదు.. ఉన్నది ఎన్నికల బంధం మాత్రమేనని తాము చెప్పేది మరోసారి రూడీ అయ్యిందన్నారు. ఎప్పటికైనా తెలంగాణ కు కేసీఆర్ నాయకత్వమే శ్రీరామ రక్ష అని స్పష్టం అయ్యిందన్నారు.

మై హోం గ్రూప్‌ నకు బీఆర్‌ఎస్‌ హయాంలో సెంట్రల్‌ యూనివర్సిటీ భూములు అప్పగించారనే ఆరోపణ మిలీనియం జోక్‌ అని ఎమ్మెల్సీ కవిత అభివర్ణించారు. కాంగ్రెస్‌ నేతలు చేస్తోన్న ఆరోపణలు నిజమే అనుకుంటే మై హోం గ్రూప్‌ పైకి బుల్డోజర్లు పంపే దమ్ము రేవంత్ రెడ్డికి ఉందా అని ప్రశ్నించారు. మై హోం గ్రూప్‌ చైర్మన్‌ బీజేపీతో ఉన్నారని.. ఆయన ప్రధాని పక్కన కూర్చుంటారని.. అలాంటి పెద్ద వ్యక్తి మీదికి హైడ్రా బుల్డోజర్లు పంపాలని చాలెంజ్‌ చేశారు. పేదల ఇండ్లపైకి, మూగజీవాలపైకి పంపే బుల్డోజర్లు పెద్దలపైకి ఎందుకు పంపడం లేదో సమాధానం చెప్పాలని డిమాండ్‌ చేశారు. హైదరాబాద్ సెంట్రల్ యూనివర్సిటీకి చెందిన 400 ఎకరాల భూములు ప్రైవేటు వ్యక్తుల చేతుల్లోకి వెళ్లకుండా కాపాడింది బీఆర్ఎస్ ప్రభుత్వమన్నారు. ఆ భూముల పరిరక్షణ కోసం కేసీఆర్ నిర్దేశం మేరకు న్యాయవాదులు కోర్టులో గట్టిగా వాదనలు వినిపించారని గుర్తు చేశారు.

సీఎం రేవంత్ రెడ్డి ప్రభుత్వాన్ని నడపలేని స్థితిలో ఉన్నారని, ఆయన దుశ్చర్య వల్ల హైదరాబాద్ లో రియల్ ఎస్టేట్ పడిపోయింది కాబట్టి 400 ఎకరాల భూమిని విక్రయించి సర్కారును నడపాలని నిర్ణయించారని అన్నారు. యూనివర్సిటీ నుంచి తీసుకున్న భూమిని యూనివర్సిటీకే ఇవ్వాలని డిమాండ్ చేస్తున్నామన్నారు. 397 ఎకరాలను మరోచోట యూనివర్సిటీకి ఇచ్చామని ప్రభుత్వం వితండవాదం చేస్తుందని, అదే 397 ఎకరాల్లో పరిశ్రమలు ఏర్పాటు చేసుకోవచ్చు కదా అని ప్రశ్నించారు. పర్యావరణం, ప్రకృతి కోణంలోనూ ప్రభుత్వం ఆలోచించాలన్నారు. ఇప్పటికే కాంక్రీట్ జంగిల్ లాగా మారిన గచ్చిబౌలి ప్రాంతంలో ఈ 400 ఎకరాల్లో కూడా పెద్ద ఎత్తున కంపెనీలు ఏర్పాటు చేస్తే వాతావరణంపై ఎంత ఒత్తిడి పెరుగుతుందో ఆలోచించాలని సూచించారు.