వైసీపీ ఎమ్మెల్సీ తోట త్రిమూర్తులకు షాక్

ఏపీలోని ఉమ్మడి తూర్పుగోదావరి జిల్లాలో వైసీపీ ఎమ్మెల్సీ తోట త్రిమూర్తులకు షాక్‌ తగిలింది.కాకినాడ జిల్లా కాజులూరు మండలం పల్లిపాలెంలో ఆయన అధీనంలో ఉన్న సీలింగ్‌ భూమిని ఎట్టకేలకు ప్రభుత్వం స్వాధీనం చేసుకుంది. పోలీసుల సమక్షంలో కాకినాడ ఆర్డీవో ఆ భూముల్లో అక్రమ రొయ్యల చెరువులను ధ్వంసం చేశారు.

అక్కడ ప్రభుత్వ భూములుగా పేర్కొంటూ హెచ్చరిక బోర్డులు ఏర్పాటు చేశారు. త్రిమూర్తులు 2005లో తన కుటుంబ సభ్యుల పేరున సీలింగ్‌ భూములు కొనుగోలు చేశారు. ఆ భూమికి సంబంధించి రెవెన్యూ అధికారులు పలుమార్లు షోకాజ్‌ నోటీసులు ఇచ్చినా పట్టించుకోలేదు.

ఈ విషయం కోర్టు వరకూ వెళ్లింది. ఇటీవల న్యాయస్థానం నుంచి అధికారులకు అనుకూలంగా ఉత్తర్వులు జారీ అయ్యాయి. దీంతో సీలింగ్‌ భూములను ప్రభుత్వానికి దఖలు పర్చాల్సిందేనంటూ కాకినాడ ఆర్డీవో ఈ నెల 19న తోట వేసిన పిటిషన్‌ను రద్దు చేశారు. ఈ నేపథ్యంలో ఆ భూములను శనివారం స్వాధీనం చేసుకున్నారు.